Ons is besig om deur 'n reeks te werk waar ons ons fokus op WONDERWERKE plaas.

Vandag gaan ons na een spesifieke wonderwerk kyk waar Jesus die blinde man genees en vir hom sig gee.

Bid saam, lees dan Johannes 9 saam deur.

Noem die dele van hierdie verhaal wat vir jou die meeste uitstaan.

Bespreek bietjie hierdie punte met mekaar.

Bespreek bietjie meer in diepte met mekaar alles wat van die blinde man bekend gemaak word in hierdie verhaal.

Plaas jouself in die blinde man se skoene. Hoekom sou die man dadelik gehoorsaam wees, en gaan was het, al weet hy nie dat Jesus die Messias is nie? Al weet hy nie dat hy daarna sal kan sien nie?

Hoekom is hierdie man blind gebore?

Wat dink die dissipels is die oorsaak van die man se blindheid?

Wat sê Jesus vir hulle?

Jesus sê in vers 5 dat Hy die lig vir die wêreld is. Bespreek hierdie woorde van Jesus met mekaar. Kyk of julle nog plekke in die Bybel kry waar Jesus sê Hy is die lig vir die wêreld.

Wat staan vir jou uit in hierdie deel van die verhaal? (Johannes 9:13-23)

Hoekom dink julle het die Fariseërs hierdie man so ondervra?

Hoekom het die man se ouers gesê: "21“Maar hoe hy nou sien, weet ons nie. En wie sy oë genees het, weet ons ook nie. Vra hom self. Hy is oud genoeg; hy kan vir homself praat.”?

Wat staan vir jou uit in hierdie deel van die verhaal? (Johannes 9:24-34)

Lees weer vers 24 tot 34 saam deur, en bespreek dit met mekaar. 

Lees vers 35 tot 41 saam deur. 

Wat is kenmerkend van hierdie deel van die verhaal? Bespreek dit met mekaar.

Dink saam oor fisiese blindheid en geestelike blindheid.

Wat is die verskil?

Wat is dieselfde?

Jesus het nie net hierdie man se fisiese blindheid genees nie. Jesus het sy geestelike blindheid ook genees...

- Eers sê hy net in vers 11: “Die man met die naam Jesus"

- Dan in vers 17 sê hy: “Hy is 'n profeet,”

- Dan sien ons hy sien vir Jesus, die Seun van die mens; Die Messias: "35Jesus het gehoor dat die Jode die man uitgeban het; en toe Hy hom kry, vra Hy vir hom: “Glo jy in die Seun van die mens?”

36Hy het geantwoord: “Wie is dit, Meneer, sodat ek in Hom kan glo?”

37Jesus het vir hom gesê: “Jy sien Hom. Dit is Hy wat met jou praat.”

38Die man sê toe: “Ek glo, Here!”

Die Fariseërs aan die anderkant het fisiese sig gehad, hulle kon sien, maar in die gees was hulle blind. Hulle kon nie vir Jesus as die lig vir die wêreld sien nie.

Jesus het ook ons geestelike blindheid genees. Ons kan Hom sien as die Messias.

As ons maar net kerk goedjies doen omdat ons moet, of omdat dit van ons verwag word, dan is ons eintlik maar blind, soos die Fariseërs blind was.

Maar as ons op Jesus vertrou en Hom sien as die geneesheer wat ons blindheid genees, dan sal ons sien, dan sal ons lewe.

Bid saam

Noem 'n paar wonderwerke wat jy uit die Bybel uit kan onthou.  Watter staan vir jou uit?  

Wanneer laas het jy 'n wonderwerk sien gebeur?  Wanneer word iets as 'n wonderwerk verklaar?  Wanneer dit onverwags is, onverklaarbaar, onmoontlik?  Daar is verskeie sienings oor wonderwerke.    

“Miracles, contrary to popular belief, do not just happen. A miracle is the achievement of the impossible, and it is only when we put aside out greed, anger, pride and prejudice so that our minds are open and ready to accept it, that a miracle can occur.”

Wat is jou siening oor wonderwerke?

Wonderwerke is dalk maar soos puisies... jy sien dalk een, en hoe meer jy kyk, besef jy daar is nog heelwat meer!  

Dit hang baie af van ons perspektief - sommige dinge is vir jou dalk moeilik om te verklaar of te verstaan, maar vir 'n ander persoon maak dit baie sin, met ander woorde hoe groot moet 'n gebeurtenis nou werklik wees voordat ons sal tevrede wees dat dit 'n wonderwerk is...?

Die opstanding van Jesus Christus moet sekerlik die grootste wonderwerk in die Bybel wees.  Baie slim gelowiges wat glo dat daar 'n almagtige God is, sukkel om die opstanding te kan aanvaar.  

Is dit oor die fisiese gebeure van die opstanding, of moontlik oor die onverklaarbare liefde wat God teenoor ons betoon het?

Lees Markus 16:9-20.  

Hierdie teksgedeelte is opsigself kontroversieel omdat dit in sommige grondtekste nie ingesluit was nie.  In sommige was dit dubbeld aangeteken.  Onverklaarbaar, maar glo ons die inhoud daarvan alhoewel ons nie heeltemal seker is waar dit vandaan kom nie?  (Sommer net bietjie food for thought en interessante inligting!).

Let op dat Jesus vir die dissipels die krag gegee het om wonderlike dade te verrig.  Nog steeds het hulle nie geglo dat Jesus werklik leef nie.  Dink maar aan Judas wat ook wondere verrig het, maar vir Jesus verraai het (Matteus 10).

Hierdie wondertekens was nie wat die deurslag en verandering in mense tot geweeg gebring het nie, want hulle harte was nog hard.  Daar was 'n klomp groot gebeure rondom die kruisiging en opstanding.  Kan jy aan 'n paar dink?  

(Dit het nag geword om 15:00... die aarde het gebewe... grafte het oopgegaan... die gordyn van die tempel het geskeur... en mense se lewens het verander).  

Die grootste wonderwerk daardie dag was liefde.  Glo jy dit?  Wat beteken dit vir jou vandag?  

So dikwels kyk ons vas teen die kragtige werking van wonderwerke... maar ons mis die grootste wonderwerk van almal.

Lees Matteus 7:21-23.  Wat beteken hierdie teks vir jou?  Wat dink jy beteken dit vir die kerk?

 Doen ons nie ook 'n klomp wonderlike dinge en verwag groot goed in ons lewe, maar ons mis die punt nie?  

Maak nie saak hoe groot of klein 'n wonderwerk is... en of jy dit 'n wonderwerk noem nie... dis 'n geleentheid vir jou om 'n verhouding met Christus te hê.  Glo jy in God se liefde?

1 Korintiërs 13 is 'n gewilde teksgedeelte oor die liefde.  

Die Korinte was 'n baie vooruitstrewende gemeenskap met aspirasies, ideale, suksesstories, kennis, kundigheid en geld.  Die stad Korinte was strategies baie goed geleë vir handel en was een van die digbevolkste stede in die Bybelse tyd.  As een van die stede waar God Sy kerk geplant het, was dit duidelik dat die mense daar geseend was met geestelike gawes en talente.  

Lees 1 Kor 12:27-31.  Lees dit in verskillende vertalings en kyk veral na vers 31.  

Wat is hierdie geheim, genadegawe, wonderteken wat die mense van Korinte mis?  Blaai na 1 Kor 13:1-7.  

Dit is die liefde.  

Die Here het wonderlike dade deur die inwoners van Korinte gedoen... maar steeds het hulle nie besef dat die grootste wonderwerk in hul lewe die liefde van Christus was nie.  Hulle was jaloers, trots, venyning, verdeeld, liefdeloos...  

"To be a miracle worker you do not have to get a doctoral degree, become a minister, eat a particular food, or be able to meditate for long hours. All you need to do is to begin to see beauty in your life and those around you." ~ Alan Cohen

Het jy jou hart al totaal en al oorgegee aan Christus?  

Dan sal geen wonderwerk te groot of te klein wees vir jou brein nie...  

Mense genees daagliks van kanker, met die hulp van dokters of op totaal onverklaarbare maniere.  Families herenig met mekaar.  Natuurverskynsels gebeur.  Verslaafdes bekeer.  Lewens verander.  

Hoeveel bewyse het jy nog nodig voordat jy besef die Here is vir jou ongelooflik lief?  Hoeveel groot dinge moet daar nog gebeur voordat jy die grootste wonderwerk in jou lewe aangryp?

Ons almal smag na geestelike gawes in ons lewe.  Maar daardie geestelike gawes raak eers werklik wonderwerke as dit die vrug van die gees weerspieel.  Glo jy in God se liefde aan die kruis?  Dan glo jy in wonderwerke!  

'n Meisie en 'n man het mekaar heel toevallig, heel onwaarskynlik, uit twee baie verskillende wêrelde op 'n partytjie in 'n gebou ontmoet.  Hoogs onwaarskynlik en moontlik 'n wonderwerk.  Ander sal weer sê dis toeval... of deel van 'n baie spesifieke plan.  

Hoe ookal, die grootste wonderwerk is nie hoe hulle ontmoet het nie, maar dat hulle elke dag in 'n verhouding met mekaar staan en saam die lewe aanpak.  Dit is ware liefde!

Here, help my om U liefde in die klein dinge rondom my raak te sien.

Here, help my om nie op my geestelike gawes in my lewe te fokus nie, maar op hoe dit my in 'n verhouding met U plaas.

Here, mag ek opnuut besef die liefde van Christus is die grootste wonderwerk in my lewe!

AMEN.

Lees 1 Konings 17:1-24.  

Wat staan vir jou uit in hierdie storie?  Watter teleurstellings merk jy op in hierdie verhaal?  

Watter wonderwerke sien jy raak?  Hoe vergelyk dit met jou eie lewe?  

Dit voel soms of die een teleurstelling op die volgende rol... maar terselftertyd gebeur daar soveel goeie goed...

Elia was 'n profeet van God.  Agab was een van die aakligste konings omdat hy blatant vir God uitgetart het.  Hy was met Isebel getroud en het 'n klipaltaar vir Baal opgerig (sien 1 Konings 16).

Volgens hul mitologie, was Baal die god van lewe - as dit met jou goed gegaan het, gereen het, jy vooruitgang en voorspoed ervaar het, was jy in Baal se goeie boekies.  

As jy teespoed, droogte en teleurstelling in die gesig gestaar het, was dit waarskynlik die oorsaak van Mot, die god van dood.

Toe Elia die droogte kom aankondig het, het hy kom bevestig dat sy God, die ware God, die God van Lewe en Dood is.  

Hy is in beheer van droogte, maar ook genesing.  

Hy is in beheer van die natuur, van die geskiedenis, van mense.  

Hy is 'n liefdevolle God wat sorg, maar ook 'n God wat straf en oordeel as dit nodig is.

Wat beteken dit vir jou?  Wie is God vir jou?  

Hoe voel jy as God nie doen waarvoor jy gehoop het nie... of as jy nie kry waarvoor jy gevra het nie?  

Waar het jy al genesing in jou lewe beleef?  En waar het dit nie gebeur nie?

Lees weer vers 18-25.  Waaroor was die weduwee bekommerd?  

Sy het gedink dat haar sonde haar kind sou weerhou van genesing.  As dit die geval was, sou die kind nie genees geword het nie.  Dit gaan dus nie oor jou nie, maar oor God se besluit.  En Elia gee oor aan God se besluit toe hy op die kind gaan lê.  Ons moet gehoorsaam wees aan 'n God wat in beheer is.

Elia kom bewys dat dit nie gaan oor wat God vir ons kan gee of bied nie, maar oor wie hy is.  

Hy is dus nie net liefdevol nie, maar ook soewerein.  Hy oefen Sy beheer uit volgens Sy wil en outoriteit.  

Dit mag dalk vir jou ontstellend wees, maar dis ook baie gerusstellend om te weet ons dien die God van Lewe en Dood.  

Kyk bietjie na die ritme van 'n hartklop.  Dit is hoe dit lyk as ons lewe.  

Soms is daar goeie tye, soms is daar slegte tye. Maar in die ritme van ons lewe is God in beheer en Hy is aktief betrokke, Hy is lewendig.  Wat beteken dit vir jou dat ons 'n lewendige God dien?

Lees weer vers 2, vers 8, vers 14.  God praat met Elia en spreek.  Lees nou vers 22.  God luister na Elia se hulpgeroep.  Hy praat en luister.  

Hy troos en Hy straf.

Hy gryp in en Hy laat toe.  

Hy maak deure toe en ander deure oop.  

Hy beweeg soos wat water in wyn verander, soos wat oliekanne vol raak en meelblikke oorloop.  Ons God "move"!

Wat sê die Bybel van die dood?  Wat sê dit van die Ewige Lewe?  Alles gaan op die einde sterf en vir die wat Hom gehoorsaam en in Hom glo, wag daar 'n tweede kans op lewe.  

Vra weer - wie is God vir my?  Net iemand wat in al jou behoeftes moet voldoen?  Of die God wat in beheer is van alles?

Haal diep asem.  Ons staan in verwondering oor die mooi goed wat gebeur al is ons nie aan die ontvangkant nie.  

Blaas nou jou asem uit.  Soms is ons harte gebreek deur die swaar tye waardeur ons moet gaan.  

Maar in die in- en uit-asem is God lewendig, aktief, persoonlik besorgd oor jou, Hy luister, Hy sorg, Hy praat en Hy regeer.

Amen. 

Lees Genesis 28:10-22.  

Jakob vlug van sy broer Esau af en bevind hom alleen in die teenwoordigheid van die Here.  Wat staan vir jou uit in hierdie teksgedeelte?  Hoe dink jy verander Jakob se gemoedstoestand van die begin van die storie tot die einde van die teksgedeelte?

Ons het al dikwels met ons familie gestry of in die moeilkheid beland as gevolg van verskeie redes, net soos Jakob.  Hoe het hierdie situasies jou al laat voel?  Wat doen jy gewoonlik in moeilike omstandighede?  

Statistiek toon dat ons of veg of vlug.  

Ons wil dikwels so gou as moontlik uit die situasie kom en dan beraam ons ons eie planne...

Ons probeer onsself regverdig of verdedig.  Of ons onttrek en maak asof dit nie gebeur het nie.  Het jy al so gevoel?

Lees weer vers 16 en 17.  

Wat kom sê God vir Jakob in sy moeilike omstandighede?  Wat beteken dit vir jou?

Meeste van die tyd bevind ons onsself tussen goeie en slegte oomblikke.  My en jou werklikheid lê tussen die hemel en aarde.  Dink bietjie daaraan - jy spandeer meeste van jou tyd oppad iewers heen.  Hoe laat dit jou voel?  

Dalk is jy op hierdie oomblik oppad na beterskap, herstel, vernuwing... of dalk is jy op 'n baie goeie plek, maar teleurstelling, swak besluite en keuses, is besig om jou af te trek...

Die goeie nuus: God is daar!  As jy deur 'n moeilike tyd gaan, is die goeie nuus dat dit net tydelik is en dat God teenwoordig is om jou te help.  Hy vertroos jou, Hy seen jou, Hy betoon Sy aangesig aan jou!  

God is ook daar waar jy besig is om te mislei, plannetjies te maak, weg te loop van die waarheid.  Dit laat jou dalk skuldig en skaam voel, maar dis goeie nuus!

Onthou jy hoe Jakob in hierdie situasie beland het?  

Jakob se familie was bekend vir die manier waarop hulle mekaar kul en mislei.  

Selfs ook as ons skuldig en skaam is, is God teenwoordig, beskerm ons en bied Hy vir ons 'n tuiste.  Hy wil jou kom verander as jy jou aangesig na Hom toe draai.  Wat vir jou soos slegte nuus klink, is die beste nuus nog!

Wat dink jy sou God wou hê jy moet in jou huidige omstandighede doen?  

Hoe dink jy moet jy 'n moeilike situasie tans hanteer?

Moenie weghardloop nie.

Moenie jou eie planne probeer beraam en verder in die moeilikheid beland nie.

Soek Sy aangesig.  Draai na Hom toe.  Wag op Hom.

Voel jy ook tussen hemel en aarde?  Tussen die boom en die bas?  

Maak God die hoofkarakter van jou storie, net soos Jakob!

Lees Psalm 23 as 'n gebed.