Lees Genesis 28:10-22.  

Jakob vlug van sy broer Esau af en bevind hom alleen in die teenwoordigheid van die Here.  Wat staan vir jou uit in hierdie teksgedeelte?  Hoe dink jy verander Jakob se gemoedstoestand van die begin van die storie tot die einde van die teksgedeelte?

Ons het al dikwels met ons familie gestry of in die moeilkheid beland as gevolg van verskeie redes, net soos Jakob.  Hoe het hierdie situasies jou al laat voel?  Wat doen jy gewoonlik in moeilike omstandighede?  

Statistiek toon dat ons of veg of vlug.  

Ons wil dikwels so gou as moontlik uit die situasie kom en dan beraam ons ons eie planne...

Ons probeer onsself regverdig of verdedig.  Of ons onttrek en maak asof dit nie gebeur het nie.  Het jy al so gevoel?

Lees weer vers 16 en 17.  

Wat kom sê God vir Jakob in sy moeilike omstandighede?  Wat beteken dit vir jou?

Meeste van die tyd bevind ons onsself tussen goeie en slegte oomblikke.  My en jou werklikheid lê tussen die hemel en aarde.  Dink bietjie daaraan - jy spandeer meeste van jou tyd oppad iewers heen.  Hoe laat dit jou voel?  

Dalk is jy op hierdie oomblik oppad na beterskap, herstel, vernuwing... of dalk is jy op 'n baie goeie plek, maar teleurstelling, swak besluite en keuses, is besig om jou af te trek...

Die goeie nuus: God is daar!  As jy deur 'n moeilike tyd gaan, is die goeie nuus dat dit net tydelik is en dat God teenwoordig is om jou te help.  Hy vertroos jou, Hy seen jou, Hy betoon Sy aangesig aan jou!  

God is ook daar waar jy besig is om te mislei, plannetjies te maak, weg te loop van die waarheid.  Dit laat jou dalk skuldig en skaam voel, maar dis goeie nuus!

Onthou jy hoe Jakob in hierdie situasie beland het?  

Jakob se familie was bekend vir die manier waarop hulle mekaar kul en mislei.  

Selfs ook as ons skuldig en skaam is, is God teenwoordig, beskerm ons en bied Hy vir ons 'n tuiste.  Hy wil jou kom verander as jy jou aangesig na Hom toe draai.  Wat vir jou soos slegte nuus klink, is die beste nuus nog!

Wat dink jy sou God wou hê jy moet in jou huidige omstandighede doen?  

Hoe dink jy moet jy 'n moeilike situasie tans hanteer?

Moenie weghardloop nie.

Moenie jou eie planne probeer beraam en verder in die moeilikheid beland nie.

Soek Sy aangesig.  Draai na Hom toe.  Wag op Hom.

Voel jy ook tussen hemel en aarde?  Tussen die boom en die bas?  

Maak God die hoofkarakter van jou storie, net soos Jakob!

Lees Psalm 23 as 'n gebed. 

Ons is besig met 'n reeks deur 1 Timoteus en sluit vandag af met 1 Timoteus 6.  Kom ons lees hierdie hele gedeelte saam.  

Watter onderwerpe is vir jou kenmerkend?  Watter woorde en verse staan spesifiek uit en praat met jou persoonlik?

Met die eerste oogopslag klink dit soos 'n boodskap oor geld.  Geld is inderdaad 'n baie groot deel van ons werklikheid en alledaagse bestaan.  

Watter rol speel geld in jou huidige omstandighede?  

Hoekom dink jy is geld so baie in ons gedagtes en het dit so 'n groot houvas op ons lewe?  Geld stop baie gate toe, maak dinge reg en beter.  

Geld gee vir ons sekuriteit en daar sonder is ons weerloos en broos.  Dit vul ons met benoudheid en dringendheid - ons is bang ons verloor ons geld of ons is bang omdat ons nie genoeg het nie.

1 Timoteus gaan egter oor meer as net materiële rykdom.  Dit gaan veral oor geestelike rykdom.  

Hoe dikwels kyk jy na jou bankbalans?  Hoeveel keer het jy al wakker gelê oor materiële dinge?  

Sou jy sê jy verdien meer of minder as jou buurman?  Is daar iets wat jy werklik op hierdie stadium voor spaar en na uitsien om te besit?  Hoe baie tyd en aandag spandeer jy daaraan?  

Net soos wat ons bekommerd is oor ons bankbalanse, meet ons dikwels ons groei en vordering aan dit wat ons rondom ons sien.  Ons kyk na ander vrouens en mans, ander leiers, persone in gesagsposisies, kollegas en ons meet onsself aan hulle standaarde.  

Hoe dink jy vergelyk jy met ander vroue, mans, leiers, kollegas?  Wat is die gevaar daaraan om jouself so te vergelyk?

1 Timoteus gee vir ons 'n nuwe spieël om in te kyk - die spieel van 'n goddelike karakter.  

Onthou jy van die standaarde van 'n goddelike karakter waarna daar in die boek van 1 Timoteus verwys is?  Hoe vergelyk jy met daardie standaarde?  Hierdie boek herinner ons daaraan dat ons ons nie aan die omstandighede en standaarde rondom ons moet meet nie... maar eerder aan God se standaarde.  

In hoe 'n maatte het jy 'n dringendheid en 'n behoefte om geestelike rykdom na te streef?

Watter waarde heg jy werklik aan geestelike rykdom?

Lees weer vers 6-10.  

Soms lyk dit onmoontlik om by God se standaarde te kan uitkom.  Ons voel ons is nie goed genoeg nie.  Ons is nie waardig nie.  Dis te moeilik om godvresend en goddelik te wees.  

1 Timoteus verwys na 'n innerlike tevredenheid.  Hoe kan jy ooit tevrede wees met jouself in terme van God se standaarde?  Ons tevredenheid lê juis nie in ons eie pogings nie... maar juis in die feit dat God se karakter so goed en uitmuntend is.  Jou identiteit lê in Hom en Sy standaard!  Wat 'n rykdom, om te besef dat God genoeg is!  Hierdie tevredenheid in Christus se karakter is wat ons in ons goddelikheid laat groei om meer en meer soos Hy te wees.

Tevredenheid in Christus lei tot die volgende: Satisfaksie in jou omstandighede.  Nederigheid.  Dissipline.  Geen jaloesie/ afguns. Geen korrupsie.  Geen gierigheid. Dit is die eienskappe wat ons so sukkel om te bereik.  Dit kom slegs uit tevredenheid, as ons besef dat Christus genoeg is.  En dit maak ons vry!

John Newton, bekende pastoor in die 18e eeu, beskryf hierdie tevredenheid in Christus as volg:

1. God gaan ook die slegte dinge in jou lewe gebruik vir groei en verandering.  Jou slegte dinge/ tekortkominge kan selfs vir ander mense 'n getuienis wees.  

2. Jy kan nie die goeie verloor nie.  God se goedheid bly by jou vir altyd.  Dit wat Hy vir jou gee, gaan nie weg nie.  

3. Die grootste rykdom is nog oppad, meer as wat jy kan verwag!

Lees weer vers 11-13.

Wat beteken dit om die goeie stryd te veg?  

Hoeveel tyd spandeer jy om oor jou finansies bekommerd te wees?  Hoeveel tyd spandeer jy om jou met ander rondom jou te vergelyk?  Moenie dat die slegte gevegte van die lewe jou waardeloos en onder druk plaas nie.  Die lewe lyk uit fokus omdat jy jou fokus moet verander.  

Wil jy nie in die goddelike spieël kyk en opnuut besef dat God genoeg is nie?  

Hy kom gee vir jou onverdiende, onskatbare waarde in die dinge wat regtig saakmaak!  

Veg om meer en meer te groei in daardie geestelike rykdom!

Amen!

Die afgelope 5 weke het saam deur die brief van Paulus aan Timoteus gewerk.

Vandag sluit ons die briewe aan Timoteus af met 2 Timoteus 1 en 2 Timoteus 2.

Dink aan 'n moeilike oomblik in jou lewe.

Het jy dalk daaraan gedink om standvastig te wees in die geloof tydens hierdie moeilike tyd?

Wat beteken dit om standvastig te wees in die geloof?

Lees die volgende teks gedeeltes saam deur, en bespreek dit.

Bespreek Paulus se roeping: "gestuur om die belofte te verkondig van die lewe in Christus Jesus."

Dink jy Paulus het hierdie roeping uit geleef?

Paulus het in die tronk gesit terwyl hy hierdie finale brief aan Timoteus geskryf het. Dit was ook die heel laaste skryf werk wat Paulus in sy lewe geskryf het.

Lees die volgende teks gedeelte saam deur.

Noem 3 goed wat vir jou in hierdie gedeelte uitstaan.

Dink oor wat Paulus hier vir Timoteus sê...

Bespreek die 3 dinge wat vir julle uit gestaan het.

Lees die volgende gedeelte saam deur.

Hoekom dink jy sou Timoteus dalk skaam wees om die evangelie te verkondig?

Hoekom dink jy sou Timoteus dalk skaam wees vir Paulus.

Dink aan die vervolging wat Paulus moes verdra vir die evangelie.

Dink jy dit was vir Paulus en Timoteus en die res van die kerk leiers en dié wat die evangelie verkondig het die moeite werd om lyding en swaar tye te beleef?

Hoekom dink jy sou dit die moeite werd wees?

As die evangelie waar is, dan is dit verseker die moeite werd om lyding te beleef vir die evangelie.

Die wêreld het 'n redder nodig, en die evangelie gee vir die wêreld, en vir ons, 'n redder.

Lees die volgende gedeelte saam deur.

Bespreek wat jy hier gelees het.

Wat staan vir jou uit?

Bespreek wat Paulus hier gesê het...

Plaas jouself in sy skoene. Sou jy bereid wees om die evangeie te verkondig, al mag dit dalk jou lewe kos?

Die evangelie is waar, en betroubaar. 

Vir Paulus was dit nie maklik om hierdie lyding te verduur nie, maar dit was die moeite werd, omdat hy weet hy kan die Here vertrou, en dat wat Jesus vir ons aan die kruis gedoen het, waar is. Hy sê dit vir ons in sy roeping beskrywing: "gestuur om die belofte te verkondig van die lewe in Christus Jesus."

Lees nou 2 Timoteus 2 van vers 3 af saam deur.

Wat staan vir jou uit?

Wat beteken dit vir jou om te vergelyk met die soldaat, die atleet en die boer?

Hoe sou jou lewe anders lyk as jy 'n soldaat was?

Hoe sou jou lewe anders lyk as jy 'n voltydse soldaat is vir Jesus as jou bevelvoerder?

Lees verder.

Bespreek hierdie gedeelte met mekaar.

Lees weer vers 10.

Wat sê vers 10 vir jou?

Bespreek vers 10 weer met mekaar.

Paulus skryf hierdie kort gedig oor die goedheid van God.

Lees dit saam deur en bespreek wat vir jou hier uitstaan.

Mag ons hierdie brief van Paulus lees, en besef dat hy (wat in die tronk sit) vir Timoteus/ ons (wat vry is) bemoedig, deur ons te herinner oor die waarheid en die waarde van die evangelie.

Ons kan, in die midde van ons verdrukking, 'n vaste hoop op Jesus Christus hê, want wat Hy vir ons aan die kruis gedoen het, red ons en gee vir ons die ewige lewe as 'n gawe, 'n geskenk.

Mag ons altyd aan Jesus vashou, maak nie saak wat ons omstandighede is nie...

Bid saam.

Wanneer laas het jy ‘n persoonlike brief gekry, spesifiek aan jou addresseer?

1 Timoteus is so ‘n baie persoonlike en spesifieke brief, juis omdat die evangelie van Christus bedoel is vir ons persoonlik, in ons persoonlike lewens.

Kyk vlugtig na 1 Timoteus 2-5.

Watter spesifieke persone staan vir jou uit? Hoe dink jy lyk hul persoonlike behoeftes? Waar bevind hierdie persone hulself geestelik? Watter uitdagings staar hulle in die gesig?

Dit maak nie saak in watter persoonlike situasie jy jouself bevind nie – die kern van die evangelie, van goddelikheid, is vir almal dieselfde.

Kom ons lees 1 Timoteus 3:14-16.

Wat staan vir jou uit in hierdie gedeelte?

Wat sê dit vir jou van die roeping van die kerk? Kom ons breek dit af.

1. Die gemeente is die huishouding van Christus
Wat beteken dit vir ons as individue in die kerk, in ons gemeenskap, in ons eie huis?  Wat beteken dit vir ons gemeente?God is die hoof van die huis. Ons staan onder Sy gesag. Niemand is beter of slegter nie. Ons is almal broers en susters, gelykes, in Sy huis. Dit gaan alles oor Hom. Ons staan saam onder Sy gesag. Is dit waar van jou gemeente? Soveel kerke bestaan vir die verkeerde redes... is hierdie die nommer een roeping van jou gemeente se bestaan?

Lees 1 Kor 12:4-11. Sien jy raak hoe daar net een gesag kan wees, een gees, een Christus?

2. Die gemeente is die teenwoordigheid van ‘n lewende God

Lees vers 16. Dit is in twee gedeeltes verdeel. Die eerste gedeelte is dit wat fisies gebeur het en waarin ons glo.  Die tweede gedeelte is hoe ons dit lewendig hou in ons alledaagse, persoonlike lewe, want Christus leef binne my en jou as individue.

Waar bevind jy jouself tans in jou persoonlike lewe?

Is jy ‘n besigheidsman of -vrou? Is jy ‘n tuisbly-mamma? Is jy ‘n jong student?

Vir elkeen van hierdie spesifieke rolle is daar spesifieke maniere waarop die evangelie met ons praat.

Hoe bid jy tans?

Wat sê die Skrif vir jou persoonlik?

Hoe kan jy die Here se stem hoor in jou konteks?

Hoe val die duiwel jou in daardie konteks aan?

Dis opvallend dat Paulus sê die gemeente is die teenwoordigheid van die lewende God. Daar waar al die besigheidsmanne en tuisbly-mammas en jong studente bymekaarkom – daar is Hy.   Ons heelwording in Christus, ons herstel, lê in die samekoms met ander wat ook deur dieselfde goed as ons gaan.

Christus is dus nie net persoonlik betrokke in jou lewe nie, hy vra persoonlike betrokkenheid in die gemeente – in jou mede broers en susters se lewens.

3. Die gemeente is die bewaarders van die waarheid.

Kyk na die foto van die Tempel van Diana of Artemis soos dit in Efese bekend was.

Wat staan vir jou uit van hierdie gebou?
Dit bestaan uit ‘n pilaar en ‘n sterk fondasie. Dit is daar om vas te hou en hoog te hou.

Weer eens is dit die gemeente se taak, nie net een persoon nie.

Sukkel jy om te vertrou? Hardloop jy weg wanneer dinge rof gaan? Kruip jy weg en raak meer privaat, meer persoonlik as dinge warm raak?

Paulus sê: Bly! Die duiwel wil ons uitmekaar uit dryf, alleen kry, maar daar waar twee of meer in my naam saamstaan, daar is Hy soveel sterker.

Lees Efesiers 6:10-12.

Watter rol kan jy speel as ‘n bewaardeer van goddelike waarheid? Watter rol kan jy speel om iemand anders te help bewaar? By wie moet jy meer persoonlik betrokke raak sodat hulle God se waarheid in hull ewe kan ervaar?

Kom ons skuif nader, raak meer persoonlik, eerder as om weg te loop, die ander wang te draai en toe te maak.

Ware dissipelskap is wanneer ons diep, persoonlike betrokkenheid in mekaar se lewens het en met diep toewyding aan mekaar die Here dien.

Wat is die waarheid van jou eie lewe?

Hoe kom praat God met jou in daardie waarheid?

Die huisgesin ken jou die beste, dalk is dit tyd om huis toe te kom.