Sessies
Ons weet dat deur die lewe beleef ons ons geloof in Jesus maar soos 'n "rollercoaster", daar is hoogte punte, en dan kort daarna is daar weer laagte punte, dit gaan maar so op-en-af.
Ons is kort kort besig om te sondig, en dit is baie frustrerend, want ons probeer so hard om hierdie heiligmaking proses aan te jaag, of as ons een voet-fout maak dan val ons weer heelwat terug in ons ou maniere, dan is dit weer 'n gesukkel om te kom waar ons was.
Mense sê hierdie stelling te gereeld en te maklik, "Ek is nie waar ek met die Here moet/wil wees nie."
Ons GLO in Jesus! Maar wat nou?
Dit is basies die vraag wat Jakobus beantwoord in sy brief wat hy aan die kerk geskryf het.
Lees Jakobus 2:14-26 saam deur.
Kom ons dink bietjie saam deur hierdie teks gedeelte...
1. (v14-17)
Jakobus sê basies dat as ons glo maar ons geloof nie in dade oor gaan nie, dan is dit eintlik 'n dooie geloof. Ek sê ek glo, maar niemand kan dit in my lewe raak sien nie. Ek is op my eie mission en alles wat ek doen is vir my en my gesin. Ons het nooit tyd vir ander mense nie en ons bou hoë mure om ons harte om onsself te beskerm.
Is ek en jy besig om ons geloof in Jesus uit te leef? Is ons besig om te doen wat Jesus van ons verwag?
Is ons besig om ons nastes lief te hê?
2. (v18-19)
Dit is baie maklik om te sê ek glo, maar is dit ware geloof as niemand dit kan raaksien nie? Sê ek dalk net ek glo want ek wil nie eendag op 'n plek sit waar Jesus nie is nie? Glo ek regtig dat Jesus my nooi na die Bruilof fees toe en dat ek deel het in Sy Koninkryk, die Hemel? Of sê ek maar net ek glo omdat ek bang is dit is waar, maar my lewe wys nie my geloof nie want ek wil die beste van altwee hê? Ek wil Hemel toe gaan, maar ek wil ook doen wat ek wil...
Dit is interessant dat Jakobus sê die bose geeste glo ook in God, want ek en jy altwee weet hulle gaan nie hemel toe nie... Wat beteken dit vir die mense wat sê hulle glo in God maar hulle lewe soos die bose geeste wil hê hulle moet lewe?
3. (v20-25)
- Abraham se voorbeeld is baie mooi, want ons kan sien hoe sy geloof (die vertroue op God se belofdes) het 'n span met die dade (die sigbare bewys) gevorm. Deur Abraham se dade kan ons baie duidelik sien dat hy opreg geglo het in God.
- Ragab se storie is ook baie waardevol, want God het haar van 'n persoon wat sonde haar beroep gemaak het, gered en gereinig, omdat sy haar geloof in God met dade bewys het, al het dit potensieël beteken dat sy haar lewe mag verloor.
👉Jakobus sê glad nie dat ons deur ons goeie dade gered word nie.
Wat hy wel sê is dat die geloof wat sonder dade is, dood is.
En dit is daardie ware geloof in Jesus; dat Hy vir ons sondes gesterf het en dat Hy ons vryspreek van ons sondes deur Sy genade, wat ons red.
Great!! ONS GLO SO ONS IS GERED!!!!
Dit is 100% waar, maar is dit ware geloof wat jy het? Geloof wat gehoorsaam is aan die wil van die Here?
✝️⚠️Geloof is basies dit... Wie het al gebungeejump?
Baie mense hou die tou naby, maar dan wil hulle nie die tou vasbind nie, want dit beteken dan hulle moet in die tou vertrou en spring. Baie mense sit selfs die tou om hulle enkels en die harnas aan, maar hulle spring nogsteeds nie, want hulle is bang die tou breek, omdat hulle twyfel. Dié mense kan nie sê hulle het gebungeejump nie. Dan kry jy die mense wat die tou en die harnas aan het en wat die tou vertrou, en wat spring, en die beste tyd van hulle lewens het. Hulle kan wel sê dat hulle al gebungeejump het...
Lees Matteus 7:21-27 saam.
Is jou Fondament op Jesus gebou?
Is jou geloof in Jesus so, dat wanneer daar 'n stortreën val, en wanneer die vloedwaters afkom, en wanneer die wind jou waai en druk, dat jy standvastig in Hom kan bly staan?
Wat ons moet besef is dat ons nog al die pad beproewings gaan beleef. Ons is in 'n reinigings proses. En wanneer ons beproewings beleef, dan moet ons juis aan ons geloof in Jesus vashou sodat ons kan volhard in ons geloof.
Daar is twee tipes geloof. Die geloof wat dood is, en die geloof wat lewend is.
Watter geloof het jy?
Die genade van die Here is gelukkig baie groot, en Hy gee ons soveel kanse om die lewende geloof te kry, en dan wanneer ons die lewende geloof het, te verdiep.
Begin jou groep sessie die week om saam die woorde te bid van Psalm 57:2-3
Lees saam ons fokus teks van die week Efesiërs 2:1-10. Wat is die eerste indruk wat jy kry as jy die teks lees?
Hierdie teks is die hartklop van die evangelie van die Here Jesus Christus
Dit bevat 3 fases -
Die eerste fase behels Efesiërs 2:1-3
Die tweede fase behels Efesiërs 2:4-9
Die derde fase behels Efesiërs 2:10
Waar bevind jy jouself tans in die 3 fases van die evangelie se proses?
Belangrik om te verstaan dat die einde bestemming van die evangelie proses eindig wanneer jy weer in die wonderlike teenwoordigheid van die Here Jesus Christus is in die hemel.
Jy arriveer nooit nie. Gedurende jou lewe op aarde is jy heeltyd in die proses tussen die fases. Belangrik om nooit te dink - nou het "ek" arriveer nie-
Jy kan maklik weer jouself terug bevind by die eerste fase en die tweede fase bou jou en my vir die derde fase.
Fresh het laas week ook na hierdie teks gekyk. Wanneer jy aktief bly in fase 1 is jy besig om jou perêls vir die varke te gooi. Die Here nooi jou uit om aktief deel te neem in die bou van die koninkryk van die hemel op aarde. Die vereis om deur fase 2 te gaan-
Heilig wees is 'n aktiewe fase saam met die Here waar jy opnuut ontdek hoe groot die Here se barmhartigheid is vir jou en my-
Lees weer Efesiërs 2:4 - wat staan vir jou uit in die vers?
Lees weer fase 2 se verse - wat staan vir jou uit in die verse?
God roep jou en my opnuut om Sy verbond kinders te wees op aarde.
Mense wat anders is as die res van die wêreld want ons identiteit lê nie in wat ons al gedoen het nie ook nie wat ons het nie, ook nie wie ons is nie, MAAR wie sin ons is!
Wanneer Jesus gedoop word deur Johannes die doper - hoor mense God se stem.
Wat die bogenoemde woorde sê.
God sê nie vir Jesus gaan evangeliseer die wêreld nie,
God sê nie vir Jesus gaan doen die regte ding nie,
God sê nie vir Jesus gaan lewe volgens my wette nie-
Nee - God bevestig Jesus se identiteit!
My en jou identiteit lê in wie sin ons is! Ons is verbonds kinders wat geroep word vir fase 3.
Wanneer laas het jy na jouself gekyk as 'n verbondskind - iemand oor wie God Homself verjeug?
Waarin het jy al vasgehaak, waarin jy jou identiteit gevind het? Dinge van fase 1?
God kom nooi jou vandag aktief uit na fase 2 op pad na die lewenslange reis met Hom-
Lees weer die woorde van Jesaja 43 - die woorde van fase 2. 'n God wat jou nooi uit fase 1 na fase 2 op pad na fase 3.
Harry Manroe was 'n man in die draai van die vorige eeu wat 'n einde aan sy lewe wou maak. Op pad na die Michigan meer in Chicago stap hy in sy dronkenskap verby 'n sendingstasie. Daar het nonne hom versorg en met hom fase 2 van Efesiërs gedeel. Met sy dood het die koerant die volgende geskryf baie jare later - "one of the most useful men in Chicago"
Hy was 'n baie bekende pastoor - hierdie nonne het ook na hom gekyk gesien daar is baie perêls en iemand wat vir God geroep is om heilig te wees -
Wie is daar in jou lewe waar jy ook fase 2 mee moet gaan deel?
Daar is 'n storie van 'n ryk man wat 'n vervalle huis in 'n prominente buurt gekoop het. Met die deposito wat die ryk man aan die eienaar gegee het, het die ou eienaar die huis probeer opknap. Drie maande later toe die nuwe eienaar die huis oorneem, sê die ou eienaar baie in sy skik, meneer ek het die huis mooi oorgeverf en opgeknap vir u. Die nuwe eienaar het reageer met die die woorde; "ek gaan die hele huis sloop en 'n nuwe huis bou"
Baie keer probeer ons fase een se dinge opknap en oorverf - Dit werk nie!
Die Here maak jou nuut!
Wat is daar wat jy moet oorgee in jou lewe aan die Here? Fase een stories...
Fase twee behels die proses wat die Here die slaaf wees van fase een breek - gaan luister die lief "I am no longer a slave"
Mag jy aanhou groei in die proses waar ons almal deur die fases van die lewe gaan - fase 1; fase 2 en die wonderlike ervarings wanneer ons in ritme met God leef in fase 3. Die proses waardeur die evangelie ons neem. God roep jou om heilig te wees -
Die hartklop is vers 4 - leef dit! Gee dit!
God is lief vir jou!
Bid saam
Ons sluit vandag die reeks oor Jesus se gelykenisse af met ‘n kykie na drie kort gelykenisse. In al die stories waarna ons gekyk het, kry ons die kontras tussen twee koninkryke – die realiteit waarin ons nou lewe en die realiteit van Jesus se ewigheid. Met gebruik van alledaagse voorbeelde en situasies, verduidelik Jesus dat ons kan uitsien na die ewigheid, maar dat dit nou reeds ‘n reaksie van ons vra.
Lees saam Matteus 13:44-50.
Wat het hierdie drie stories met mekaar in gemeen? Hoe verskil die drie stories van mekaar?
Die eerste storie is van ‘n man wat op ‘n skat afgekom het, heel toevallig, maar toe hy die waarde daarvan besef, het hy alles in sy vermoë gedoen om dit nie te verloor nie. Hy was bereid om alles te verkoop, net om dit nie te verloor nie.
Die tweede storie is van ‘n man wat op soek was na ‘n baie waardevolle pêrel wat die moeite werd sou wees. Toe hy dit uiteindelik vind, was hy ook bereid om alles te verkoop om dit te besit.
Dit maak dus nie saak hoe ‘n mens by die evangelie uitkom of wanneer Christus deel raak van jou lewe nie, maar of jy die waarde daarvan besef en hoe jy daarop reageer. In beide stories is daar geen twyfel by die persone dat hulle alles moet gee nie - en hulle gee dit met oorgawe en vreugde!
Dink ons nie hoe meer ons gaan bereik of doen, hoe gelukkiger gaan wees of hoe meer vreugde gaan ons eendag in die hemel ervaar nie? Nee, die vreugde is eerste daar, en daarna die moeite en opoffering, want dan is dit met 'n blye hart.
Besef jy dat om Christus nou reeds in jou lewe te hê, reeds ‘n stukkie van die hemel op aarde vir jou oopmaak? Ons kan nie in die verlede of in die toekoms lewe of uitsien na die ewigheid sonder om nou reeds opgewonde te wees en volgens God se wil te lewe nie.
Die vraag is nie wat jy moet gee of opoffer of hoeveel dit van jou vra om ‘n Christen te wees nie... die vraag is eerder of jy besef hoe waardevol die skat is wat jy ontvang het... want dan is die opofferings wat jy moet maak dubbeld die moeite werd.
Het jy nou N$300 000? Party van ons sal sê “nee.” Party sal eers wil weet waarvoor. Wel, as dit vir ‘n baie duur motor is wat eintlik meer as ‘n miljoen kos, sal ons ewe skielik bereid wees om die geld bymekaar te maak of uit te haal.
Hoekom? As jy regtig die waarde van iets besef, of dit baie graag wil hê, sal dit nie te veel moeite wees vir jou om te betaal nie. Jy doen dit met ‘n glimlag.
Lees Filippense 4:7-8. Hoe klink Paulus se gemoedstoestand vir jou?
Dit klink of hy baie moet verloor of prys gee, maar dit klink ook nie of dit vir hom so moeilike besluit is nie. Hy doen dit selfs met ‘n blye hart.
Net so, is daar sekere goed in jou lewe wat nie die moeite werd is nie. Dit is nie die moeite werd om sekere situasies te ondersoek of uit te toets nie. Dis nie die moeite werd om met sekere persone te redeneer of te baklei nie.
Kan jy dink aan areas van jou lewe wat eintlik nie die moeite werd is nie?
En watter areas van jou lewe is die moeite werd om meer tyd aan te spandeer, meer te investeer? As dit vir jou die moeite werd is, sal jy tyd maak daarvoor! As dit die moeite werd is, sal jy dit prioritiseer!
Die realiteit van twee koninkryke is dat daar ‘n dag gaan kom wanneer God die visnet gaan uitgooi, die koring van die onkruid gaan skei. Dis ‘n saak van lewe en dood. Wat kies jy? Hoe reageer jy daarop? Opgewonde oor die lewe... of beangs vir die dood?
Dit beteken jy staan of onder die heerskappy van God of onder jou eie leierskap. As jy die waarde van God se heerskappy werklik besef, sal jy alles verkoop en trek. Jy kan nie op die draad bly sit nie.
Is daar sekere areas in jou lewe waar jy nog nie volkome aan Christus oorgegee het nie? Is daar sekere areas waar jy nog ietsie wil terughou?
Dalk het jy iets waarvan jy moet bekeer op hierdie oomblik en tyd. God vra nie noodwendig hoe lyk jou geskiedenis of wat het jy bereik of wat wil jy eendag word nie... elke dag is ‘n nuwe geleentheid om voluit vir Christus te lewe.
Hoe moet jy lewe lyk as jy by die wins van Christus aan die einde van jou balansstaat wil uitkom?
Wat is die moeite werd en wat moet jy liewer los om jou heiligheid te behou? Dalk moet ons almal vandag bekeer dat ons nie met genoeg oorgawe ons huidige lewe en geleenthede aanpak nie. Ons is nog besig om somme te maak en te oorweeg...
Lees Matteus 7:6. Wat beteken hierdie vers vir jou?
Dis ‘n saak van lewe of dood – of jy doen dit, of jy doen nie. Of jy glo, of jy glo nie. Of jy aanvaar die Bybel, of jy doen nie. Of jy gee jou lewe, of jy gee nie.
Dis alles of niks.
Amen.
Website Developed and Hosted by